AS 91782 Annotated exemplars

Ko te tauaromahi he tauira mahi ā te ākonga e whakamārama ana i te matū o te paerewa paetae. He mea āwhina i te kaiako ki te kōwhiri whakataunga aromatawai ki te taumata e tika ana.

Tuku iho ngā tauaromahi me ngā whakamārama katoa [PDF, 506 KB]

TKI Te Reo Rangatira Rauemi Aromatawai (external link)

Mō Kairangi, me tārai te ākonga he pakiwaitara poto e āta matapaki ana he tuahangata i tētahi take ahurea me te whakamahi i ngā rautaki tuhituhi e hāpai ana i ngā nuka reo hei whakaniko i te pakiwaitara. Ka taea e te ākonga tēnei mā:

• te nanakia o te whakarite i te kiripuaki matua ki tā tuahangata me tuawahine e mahi ai
• te nanakia o te whakamahi i ngā nuka reo me ngā nuka tuhituhi hei whakaara i te pakiwaitara kia kounga ai
• te tika o te tārai i te tāhū o te pakiwaitara kia mau ai te hungā pānui.

He nanahu te whare kōrero o te ākonga, i tuitui i ngā ariā ahurea hei tūāpapa mō te kaupapa nei kia aro mai te hunga pānui. Kua whakaahua i ngā whēako, i ngā mahi hoki o te tuahangata me ōna pānga ki te pakiwaitara mai i te tirohanga o te kaituhi (1).

Kua nanakia te whakawhanaketanga o ngā whakaaro o te pakanga i waenganui i te Tangata whenua me Tauiwi. Kua āta whakatakotoria e te ākonga ōna rongorongo i te wāhi o te pakanga, tōna mauheretanga me tana mahi pūrahorua ki tōna ake iwi. Ko te take matua o te pakiwaitara ko te whenua, te raupatu whenua, te pakanga mō te whenua me te mana motuhake o te tangata whenua (2).

E hāngai tika ana ngā nuka reo ki te kaupapa o te pakiwaitara. Kua hāpai ngā nuka reo i ngā pikitia ā-kupu e tūhono ana ki te wā me te tūmomo āhua o te horopaki (3).

Kia pūmau te whiwhinga Kairangi Pari tērā pea me whakamārama i te pānga o te pakanga, o te raupatu whenua rānei ki tōna iwi. I mate noatia ia kāore i ea te take ahurea, kāore he tirohanga whakamua rānei o ngā iwi i tū ki te whawhai. I mate noa te take me te tuahangata.

Mō Kaiaka, me tārai te ākonga he pakiwaitara poto e āta matapaki ana he tuahangata i tētahi take ahurea me te whakamahi i ngā rautaki tuhituhi e hāpai ana i ngā nuka reo hei whakaniko i te pakiwaitara. Ka taea e te ākonga tēnei mā:

• te āta whakarite i te kiripuaki matua ki tā tuahatanga me tuawahine e mahi ai
• te āta whakamahi i ngā nuka reo me ngā nuka tuhituhi hei hiki i te pakiwaitara
• te tārai i te tāhū o te pakiwaitara kia aro ai te hunga pānui.

Kua āta whakarite i te tāhū o ngā ariā ahurea hei tūāpapa mō te kaupapa nei kia tō mai i te hinengaro o te hunga pānui. He nanakia ngā nuka reo kua whakamahia e te ākonga e hāpai ana i ngā pikitia ā-kupu kia whai ai i ngā tirohanga, i ngā whēako o te tuahangata (1).

Kua āta whakarite i ngā parekura i waenganui i te Tangata whenua me Tauiwi. Te whakataurekareka i te tuahangata kia whai i ngā tonotono o Tauiwi, kia noho hei pūrahorua – ki tā te kaituhi kia noho ngū te tuahangata pērā i te kiore i mua tonu i tana kōkiri i te hoariri. Kua āta whakatakotoria e te ākonga he rautaki mā te tuahangata, kia whakawātea mai ia i ngā ringa o Tauiwi ahakoa i te otinga i riro ia hei raukakai o te pakanga (2).

Kia eke ki te Kairangi, tērā pea me hoki anō ki te whakamutunga i oti wawe nei, i mate te tuahangata, ko ia te raukakai o te pakanga engari kāore he tirohanga whakamua rānei o ngā iwi i tū ki te whawhai. I mate noa te take me te tuahangata.

Mō Paetae me tārai te ākonga he pakiwaitara poto e matapaki ana he tuawahine i tētahi take ahurea me te whakamahi i ngā rautaki tuhituhi e hāpai ana i ngā nuka reo hei whakaniko i te pakiwaitara. Ka taea e te ākonga tēnei mā:

• te whakarite i te kiripuaki matua ki tā tuahangata me tuawahine e mahi ai
• te whakamahi i ngā nuka reo me ngā nuka tuhituhi o te pakiwaitara
• te tārai i te tāhū o te pakiwaitara.

He ngāwari noa te whai i te tāhū o te pakiwaitara ahakoa ngā hapa. Ko tā te ākonga he whakatau i te tūāpapa o te kōrero, arā, ko te tiaki i tōna matua (1).

Ka matapaki i ngā whakaaro o te tuawahine ki te tiaki i te mana o tōna pāpā a Kaingākau te Kīngi o Manawarea. Ahakoa i kahakina te Kīngi i te kore whakarongo o tōna pāpā. Hei te otinga o te pakiwaitara, kua riro mai te tuawahine i te Kīngi, kua ora te mana o te Kīngi (2).

I whakamahi te kaituhi i ētahi nuka reo hei hiki i te pakiwaitara (3).

Kia eke ki te Kaiaka me wherawhera te wāhanga o te pakanga, te rirohanga o te Kīngi. I oti noa te pakanga ka hoki te tuawahine me te Kīngi ki tōna kāinga. Ka ahatia, ka whai noa i te oranga tonutanga anō? Kua tau te rangimarie i waenganui i ngā iwi?