Kōrero whakamahuki
Nō te marama o Mahuru 2021, i ara mai ēnei take hōu i ngā mahi matairua.
He tohutohu ēnei kia āwhina i te Kaiako ki te whakatutuki i ngā paerewa 1.115A me te 1.15B hei kaupapa kotahi.
E rua ngā huarahi kia whakatutuki ai ngā ākonga i ēnei paerewa.
- Pāngarau 1.15A: He Kōpaki Tuhinga Pangarau
- Pāngarau 1.15B: Te Whakapau Kōhinu
Paerewa Paetae 1.15A
Ka kōwhiria ētahi tauira mahi e toru, kei a koutou ko ngā ākonga te kōwhiringa ko ēhea tauira mahi. Ko te tauira mahi he mahi i ahu mai i ngā mahi o te ākomanga, nō tētahi ngohe, nō tētahi paerewa rānei.
I roto i ēnei tauira mahi me whakaatu te ākonga i tana mōhio ki te reo matatini o te pāngarau ki āna mahi katoa. Me hāngai hoki ki ngā kōrero ki te whārangi taunaki o te AS91656.
Ko te whakamārama i ngā mahi me ngā wāhanga katoa o te rautaki i whāia hei whakaoti i te rapanga te aronga matua o ngā mahi.
Paerewa Paetae 1.15B
Ka āta pānui i ngā kōrero mō ngā motukā e rua, ā, ka whakatairitea te rōrahi o te kōhinu e toe ana i te paunga o ia hauono o te haerenga. Ka tuhia ētahi whakamārama mō te kauwhata e whakatairite ana i te whakapaunga o te kōhinu o ngā motukā e rua.
He tātaringa raraunga te aronga matua o tēnei ngohe, kia whakaatu te ākonga i āna mōhiotanga ki te puna kupu pāngarau.
He Kōrero Atu Anō
Kaua te ākonga e raru mēnā ka whakamahia te otinga hē i roto i āna whakamāramatanga, ko tōna reo matatini kē o te pāngarau te mea e aromatawai ana.
Mēnā e hē ana te rautaki i whāia ai e te ākonga, ko tana mārama ki ngā whakahokinga kōrero a te kaiako me tana whakatikatika i āna whakamārama te mea ka aromatawaihia.