Kōrero whakamahuki
Nō te marama o Hakihea 2020 ngā kōrero whakamahuki nei.
Ko te aronga o tēnei paerewa ko te tito i te upoko pukapuka me te mahere o te pukapuka.
Upoko Pukapuka
Ko te tito i te upoko kotahi noa iho o te pukapuka te mahi. Heoi anō, me āta whakamahere tonu i ngā whakaaro mō ia upoko e puta ai te pukapuka.
Mahi Maherehere
Me wānanga, me ohia manomano i ēnei āhuatanga:
• ko te tāhū kōrero,
• ko te whāinga matua o te kaituhi,
• ko ngā tikanga / akoranga o roto,
• mā wai te pukapuka?
• ko te kiripuaki matua,
• te pai, te kino rānei o ngā horopaki, o te tirohanga tuhi me ngā hanga tuhituhi rerekē.
Ko ngā hanga tuhituhi, ko ngā hanga rerekē o te tuhinga. Hei tauira, tērā pea, ka tīmata ki tētahi mōteatea e whakaatu ana i te pōuritanga o te kiripuaki matua. Ka whakawhiti ki ngā rerenga poto, ki ngā rerenga kikī ana ki ngā kupu tūāhua e whakamārama ana i te āhua o te kiripuaki, i te āhua hoki o te horopaki, e whakaatuhia ana kua tino hē ngā rā o tōna ao. Me hāngai pū ngā hanga tuhituhi me ngā nuka reo ki te horopaki o te momo tuhinga.
Me tiaki ngā mahi maherehere me ngā tuhinga hukihuki katoa.
Whakawāwā
Me tātari i te kounga o te tukanga titotito i puta mai ai ngā panonitanga ki te mahere me te titonga upoko. Mā reira e kite ai ngā āhuatanga pai e rata mai ai te hunga pānui. Ka mutu, ko te hua nui ko te upoko pukapuka kua āta arohaehaetia, ā, kua whakatikahia.